نەخۆشییەکانی کەسایەتی
کەسایەتی پێناسە دەکرێت بە کۆی ئەو تایبەتمەندییانەی کەسەکان هەیانە لە شێوازی هەڵبژاردنی گۆنجاوترین وەڵامدانەوە بۆ خۆگۆنجاندن یان مامەڵەکردن لەگەڵ ڕووداوەکان و هەلومەرجەکان، ئەمەش لەسەر بنەمای چۆنایەتی تایبەتمەندییە جیاکەرەوەکانیان ڕوو دەدات.
هەر مرۆڤێک، خاوەنی خاسییەت و تایبەتمەندی کەسایەتی تایبەت بەخۆیەتیو لەم بارەیەوە چەندین تیۆر خڕاونەتەڕوو، خاسیەتی ڕەفتاری بریتییە لە چۆنایەتی ڕەفتاری تاکەکان کە شێوازی وەڵامدانەوەیان بەرانبەر بارودۆخەکان دیاری دەکات. هەر کەسە کۆمەڵێک مێتۆدی تایبەتی بۆ ڕووبەڕووبوونەوەی ڕووداوەکان و ئەزموونی ژیان بەسەەبردن هەیە، خاسیەت و تایبەتمەندییەکانی کەسایەتی و ڕەفتاری کەسەکە کاریگەری ڕاستەوخۆ لە سەر کۆی سیستەمی ژیانی کەسەکە دادەنێن.
زۆر فاکتەر هەن کە کاریگەری لەسەر پێکەاتەی کەسایەتی مرۆڤەکان دادەنێن، بەتایبەتی ئەزموونەکانی سەردەمی منداڵی و تەواوی ئەزموونە ژیانییەکان و ڕووداوە خۆش و ناخۆشەکان و ڕووداوە زەبراوییەکان. هەر وەها گریمانە هەیە کە زۆربەی تایبەتمەندییەکانی کەسایەتی مرۆڤ پەیوەست بە ناوچەی کەلەی سەری مرۆڤەکانەوە هەیە، بنەمای زۆربەی تایبەتمەندییەکانی مرۆڤ پەیوەستە بەو بەشەی مێشکە کە پێی دەوترێت سێڕیباڵ کۆرتێکس.
جۆرەکانی نەخۆشی کەسایەتی
نەخۆشی کەسایەتی گشتی:
سەرهەڵدان و مانەوەی جۆرێک لە ئەزموون و ڕەفتار لای تاک، لە چاو خوااتەکانی کلتوری تاکەکە و دەوروبەری بە تەواوی نەخوازراوە. دەکرێت چەند لایەنێک بگرێتەوە وەکوو لایەنی مەعریفی( شێوازی تێگەیشتن لە خۆد ، خەڵک ، دەوروبەر)، لایەنی هەڵچوونی( ئاست، بڕ و گۆنجاوی وەڵامە هەڵچوونییەکانی کەسەکە)، چالاکییە نێوان کەس و کۆمەڵایەتییەکان لەگەڵ خەڵکی( تاک ناتوانێت خۆی کۆنتڕۆڵ بکات لە ئەنجام نەدانیان). هاوکات کەسەکە لەسەر ئاستێکی فراوان و بەرین لە کۆمەڵگە و لەگەڵ دەورووبەرەکەی توانای گۆنجانی دروستی نییە، ئەمە کاریگەرییەکی وەها لەسەر تاکەکە دادەنێت لە ڕووی کۆمەڵایەتی و پەیوەندییەکانییەوە ناکارا و لاواز دەرکەوێت، لەوانەیە کاریگەری لەسەر کار و پیشە و باقی کاروچالاکییەکانی تری ژیانیشی دابنێت. ءەم کۆمەڵە نیشانی دەبێت بۆ ماوەیەکی زۆر بەردەوام بن لەناو کەسەکەدا، هەندێکیان لەوانەیە هەر لە سەردەمی منداڵییەوە بەو جۆرە دەرکەوتبێتن. كۆنیشانەکان نابێت پەتوەندی بە نەخۆشییەکی ترەوە بێت.
نەخۆشی کەسایەتی پارانۆیید:
هەبوونی گۆمانێکی زۆر بەرانبەر بە دەوروبەر و کەسانی دەوروبەری خۆی، بۆ نموونە کەسەکە دەبێت بەبێ هەبوونی بەڵگەیەکی دیاریکراو، گۆمانێکی زۆری لە کەسانی دەوروبەری خۆی هەبێت. پێی وابێت ئەو کەسانە ویستیان ئەوەیە زیان بەو بگەیەنێن یان بە جۆرێک لە جۆرەکان ئازاری بدەن. کەسەکە گۆمان لە هەموو شتێک دەکات و تەنانەت ڕاستگۆیی و متمانەداری تەواوی کەسانی دەخاتە ژێر پرسیارەوە، بە هۆی ئەمە وە کەسەکە بە هیچ جۆرێک متمانە بە کەسانی دەوروبەری خۆی ناکات و هیچ باس و قسەگەلێکی لە گەڵدا ئەنجام نادات، تەنانەت شتە سادەکانی ژیانیشی و هیچیان لا نادرکێنێت ، چونکە پێی وایە ڕۆژێک ئەو زانیارییانەی لە دژی خۆی بەکار دەهێننەوە. لە خۆیەوە خوێندنەوەی نهێنی ئامێز بۆ ڕووداوەکان و هەلومەرجەکان دەکات. بەردەوام خۆی و دڵی خۆی پڕ لە کینە ڕادەگرێت و ئامادەی لێخۆشبوون لە بچووکترین هەڵە بەرانبەر کەسەکانی دەورووبەری نییە، ڕێژەی بڕیاردانی هەڵەی زۆر زۆرە. ئەگەر ژن یان پیاو بن، بە خێرایی بەرەو جۆرێک لە گومانی خیانەتی هاوسەرگیری و بوونی پەیوەندی سێکسی بە کەسەکان دەبەن. هەندێکی حاڵەتی وەک نەبوونی متمانە بەوانی تر، یان پیشاننەدانی هیچ جۆرە لێخۆشبوونێک بەرانبەر کەسەکان کاتێک هەڵەیەک هەیە لای کەسانی توشبووی زۆرە. لەبەر ئەوە هیچ کات متمانەیان بە دەورووبەریان نییە. بەشێکی زۆری ئەم نەخۆشییە هەر لە منداڵییەوە کۆنیشانەی متمانە بەوانی تر دەبیندرێت. پیاوان زیاتر توشی ئەم نەخۆشییە دەبن.
نەخۆشی کەسایەتی سکیزۆید:
کەسانی توشبوو بەم نەخۆشییە هەر لە سەرەتای لاوێتییەوە هەندێک کۆنیشانەیان تێدا ڕوو دەدات، وەکوو
- نەبوونی هاوپەیوەستییەکی توند بە نزیکەکانیان یان کەسانی دەورووبەریان
- ڕەق و بێ هەستوسۆزن
- دەربڕینە هەڵچوونییەکانیان زۆر وشک و بێسۆزانەن
- چیژێکی وەها لەهەبوونی پەیوەندی لەگەڵ کەسانی دەورووبەریان نابینن
- خواستێکی وەهایان بۆ هەبوونی پەیوەندی لەگەڵ کەسانی دەورووبەریان نییە
- هەمیشە یارییەکانیان یەک نەفەرین و بە تەنیا خۆیان خهریکیان دەبن
- خواستێکی کەمیان هەیە بۆ پەیوەندی سێکسی لەگەڵ کەسانی تردا
- هاوڕێی تایبەتیان نییە و چێژی زۆریش لە چالاکییە گشتییەکان وەر ناگرن
- هەڵسووکەوتیان لە گەڵ کەسانی دەورووبەریان زۆر سارد و وشکن
- لە دەموچاویاندا کەمجار دەکرێت ئاماژەی هیچ جۆرە هەستوسۆزێک دیاری بکرێت.
نەخۆشی کەسایەتی سکیزۆتایپاڵ:
ئەو کەسامەی لەم گڕووپی نەخۆشییەدا جێیان دەبێتەوە تا ڕادەییەک بە شێوەیەکی کەمتر کۆنیشانەکانی سکیزەفێنییەیان تێدا دەردەکەوێت، نەک بە تەواوی هەموویان و بەو ئاستە کەمتر لە بڕ و ئاست.
کۆنیشانەکانی ئەم نەخۆشییە بریتیە لە
- گۆشەگیری کۆمەڵایەتین
- خاوەنی جۆرێک لە هزری هەڵە و جادوویین
- پێیان وایە دەتوانن مێشکی ئەوانی تر بخوێننەوە، هەستی شەشەم لای ئەوان زۆر باوە
- زۆر کار لەسەر خوێندنەوەی داهاتوو دەکەن
- باوەڕیان هەیە کاتێک ڕووداوێکی زۆر ئاسایی و هەڕەمەکی لە ژیانیاندا ڕوو دەدات، پێیان وایە مانایێکی زۆر بەرز و تایبەتی بۆ ئەمان تێدایە
- باوەڕ و متمانە بە دەورووبەرەکانیان ناکەن
- جار جار هەندێک هەستی هەڵەیان تێدا دروست دەبێت، وەک بینین و تێڕوانینیان بۆ لاشەیان و ئەندامەکآنی لاشەیان و بیستن و دەنگ، ئەمە وادەکات قسەکردنیشیان زۆر سیستیماتیک و لۆژیکی و ڕوون نەبێت
- جار جار لەوانەیە لەگەڵ خۆیاندا قسە بکە، جلوبەرگی کۆن و دڕاو لەبەر بکەن
- هەبوونی ئایدیای پەراوێزگەرایە، واتە بۆ ڕووداوێکی زۆر سانا و ئاسایی ژیانی ڕۆژانە مانا و لێکدانەوەیەکی زۆر نائاسایی دەدۆزنەوە، ئەمەش وادەکات پێیان وابێت ئەوان خاوەنی هێزێکی تایبەتن بۆ پەیبردن بە ددونیا و ڕووداوەکانی دەورووبەر
- خاوەنی هاوڕێی زۆر کەمن و حەزییان لە دروستکردنی پەیوەندی داخراو و ڕاستەقینە و نزیک لەگەڵ هیچ کەسدا نییە
ئەم کۆنیشانانە وایان لێ دەکات، پەیوەندی ئاسایی لە گەڵ دەورووبەرکانیان نەبێت، هاوکات خاوەنی تێگەیشتنێکی زۆر کەموکوڕ و هوڵەن لە بارەی ئەوانی تر . هەموو ئەم فاکتەرانە وادەکەن ئەم جۆرە کەسانە نەتوانن پەیوەندییەکی تەندروستییان لەگەڵ دەورووبەردا هەبێت. ڕێژەی ئەم نەخۆشییە لە ناو نێرینەکاندا بەراوەر بە مێینەکان زیاترە.
نەخۆشی کەسایەتی دژەکۆمەڵ
توشبووان بەم نەخۆشییە هیچ ڕێزێک بۆ یاسا و ماف و ئازادی کەسانی تر دانانێن. زیاتر لەو کەسانەی تەمەنیان لە 18 ساڵی بەرەو سەرەوەیو دەردەکەوێت.
کۆنیشانەکانی ئەم نەخۆشییە بریتییە لە:
- توشی کێشەی پەیوەندی لە کۆمەڵگادا دەبن
- توانای ڕێزگرتنیان لە نۆرمەکانی کۆمەڵگە نییە
- هیچ ڕێزێکی یاساو ڕێسا فەرمییەکانیش ناگرن و لەسەر ئەو پەرچدانەوە و نواندنانەیان زۆربەی کاتەکان دەستگیر دەکرێن
- درۆ و فێڵ لە دەورووبەرییەکانیان دەکەن، هەموو ئەو شتانەش لە پێناو چێژ وەرگرتنی شەخسی خۆیان ئەنجام دەدەن
- توانای دانانی پلانیان نییە و ڕەفتار و پەرچدانەوەی لە پڕی زۆریان هەیە
- توڕە و شەڕانگێزن
- توانای لە بەرچاوگرتنی سەلامەتی و پارێزراوی خۆیان و ئەوانی تریان نییە، بۆیە زۆربەی کاتەکان زیانی جۆراوجۆر بەخۆیان و ئەوانی تریش دەگەیەنن
- توانای هەڵگرتنی بەرپرسیارێتییان نییە و شکەست لە دوای شکەست لە هەنگاوەکانیاندا بە دی دەکرێت
- بەردەوام پاساوی سەیروسەمەر بۆ شکەستەکانیان دەهێنن
- زۆر ئاسایی دزی لە کەسە نزیکەکانیان و ئەوانی تریش دەکەن و گوێ بە ئازاردانی دەروونی و جەستەیی و هەست و سۆزی ئەوانی تر نادەن
- زۆربەی کاتەکان نەخۆشی مامەڵەکردنیان هەیە
- بە پێی توێژینەوەکان زۆربەی، ئەم جۆرە کەسانە لە دەرەوەی سەنتەری شارەکانن، یان کەسانێکن ئالوودەی ماددەی هۆشبەر و ئەلکهول بوون. بەراورد بە مێینەکان، ئەم نەخۆشییە لای نێرینەکان زیاترە.
نەخۆشی کەسایەتی سنووری:
ئەم جۆرە کەسانە گرفتێکی بنەماییان هەیە لە بۆنیادی ئاستی سنووری پەیوەندییەکانیان لەگەڵ ئەوانی تر، لە بابەتەکانی وەک جێگیری و شێوازی هەبوونی وێنەیەک لە خۆیان و چۆنایەتی هەستوسۆز و هەڵچوونەکانیان. لە سەرەتای منداڵییەوە دەست پێ دەکات ئەو کەسانە توشی ئەم نەخۆشییە دەبن کۆمەڵێکی زۆر گرفتی پەیوەندییان هەیە، گرفت لە هەبوونی وێنەیەکی جێگیر و ڕوون لە بارەی خۆیان، گرفت لە چۆنایەتی هەڵچوون لە بارودۆخە جیاوازەکاندا. بە گشتی ئەم نەخۆشییە بە ڕێژەیەکی زۆر بەراورد بە نێرینە، لای مێینە زیاتر دەردەکەوێت.
کۆنیشانەکانی بریتییە لە:
- بەردەوام گرفتیان لە نەبوونی جێگیری لە پەیوەندییەکانیان لەگەڵ ئەوانی تر هەیە
- هەڵسەنگاندن و ئایدیا و تێگەیشتنەکانیان زۆر بێسنوور و ئایدیاڵییە
- لە پارە سەرفکردندا زۆر سەرەڕۆن
- لە سێکسکردن و ماددەی هۆشبەر و شۆفێری خێرادا زیادەڕەون
- بە مەبەستی ترساندن و ناچارکردنی ئەوانی تر هەوڵی پیشاندانی خۆئازاری و خۆبرینداری دەدەن
- شێوازی پەرچدانەوە هەڵچوونەکانیان زۆر ناجێگیرانەیە
- بە شێوەیەکی خۆر خێرا میزاج و ڕەفتار و شێوازی ماماڵەی لەگەڵ ئەوانی تردا دەگۆڕدرێت
- بڕێکیان بە ئاسانی بەرەو قۆمارکردن دەڕۆن
- هەڵچوون و هەستوسۆزیان زۆر هەستەوەرە، بەڵام بە شێوەیەکی زۆر خێرا دەگۆڕدرێن و ناجێگیرن
- زۆربەی کاتەکان توڕە دەبن و توانای کۆنتڕۆڵکردنی توڕەبوونەکەی خۆیانیان نییە
- بڕێکی زۆر لە ئایدیای پارانۆییدیان هەیە و گۆمانی زۆر لە کەسەکانی دەوروبەریان دەکەن
- زۆربەی کات زوو گۆزەر دەردەکەون و بە ئاسانی پەیوەندییەکانیان لەگەڵ کەسانی دەورووبەر دەپچڕێنن و بەرەو لای کەسانی تر دەڕۆن.
نەخۆشی کەسایەتی هیسترۆنیک:
کۆنیشانەکانی ئەم جۆرە نەخۆشییە بریتییە لە
- پێویستیان بەوەیە سەرنج بدرێن و لە لایەنی ئەوانی ترەوە ببنە بابەت و خۆیان پیشان بدەن
- هەمیشە هەست بە نائارامی دەکەن، بە تایبەتی کاتێک دەکەونە بارودۆخێکەوە جێی سەرنج نین
- ڕەفتاری وروژێنەری سێکسییان زۆرە
- زۆر بە خێرایی و کورت توانای دەربڕینی هەستەکانی خۆیانیان هەیە
- گرنگییەکی تایبەت بە جلوبەرگ و ڕووکاری دەرەوەی خۆیان دەدەن
- لە کاتی قسەکردندا ناچنە وردەکاری باسەکانەوە و بە شێوەیەکی ڕووکەش قسە دەکەن
- ژیان لای ئەوان وەک بوونە لەسەر تەختەی شانۆیەک، ڕەفتارەکانیان شانۆئامێز و دراماتیکە
- زۆر بە خێرایی دەکەونە ژێر کاریگەری قسە و ئاراستەی کەسانی ترەوە
- بزانن چ شتێک لە لایەن دەوروبەرەوە خوازراوە بە خێرایی هەوڵی گۆڕینی خۆیان بەو جۆرە دەدەن
- هەمیشە لە پەیوەندییەکانیاندا زۆر لەوەی بە ڕاستی لە ناخەوە هەستی پێی دەکەن، ڕووکەشانە زۆر زیاتر لەوە پیشانی بەرانبەرەژانیان دەدەن
- توێژینەوەکان ئاماژە بەوە دەکەن ڕێژەی بەربڵاوی ئەم نەخۆشییە لە مێینەکاندا زیاترە.
نەخۆشی کەسایەتی خۆدشەیدا:
توشبووان بەم نەخۆشییە ڕێژەیەکی زۆر بەرز لە خۆ بەگەورەزانی و خۆبەناوازەزانین تێیاندایە، ئەمەش هەم لە خەیاڵ و فەنتازییاکاندا بوونی هەیە و هەم لە ڕەفتارەکانیشیاندا پیشانی دەدەن.لە سەرەتای لاوێتییەوە کۆنیشانەکانیان تێدا دەردەکەوێت. ڕێژەی نێرینەکان لە توشبوون بەم نەخۆشییە زیاترە.
کۆنیشانەکانی ئەم نەخۆشییە بریتییە لە
- زۆر بە کەمی هاوسۆزی دەنوێنن
- همیشە پێیان وایە پێویستیان بە دەستخۆشی هەیە
- هەست دەکەن کەسانێکی زۆر گرنگن
- خۆیان بە گەورە، زیرەک و سەرکەوتوو دەزانن، بە بێ ئەوەی دەستکەوتێکیان هەبێت
- باوەڕیان وایە زۆر تایبەت و ناوازەن
- بەردەوام چاوەڕێی ئەوە دەکەن دەستخۆشییان لێ بکرێت
- هەمیشە پێشبینی و چاوەڕوانی زۆر نالۆژیکی لە کەسەکان و شتەکانی دەوروبەریان هەیە
- پێیان وایە لە بارەی خۆیان و ڕەفتار و کێشەکانیان تەنیا خۆیان دەتوانن هاوکاری خۆیان بن و هەستێکی خۆبەگەورەزانی لە ڕادەبەدەریان تێدایە
- کەسەکان بە کار دەهێنن بۆ گەیشتن بە ئامانجەکانیان
- هەستوسۆزی زۆر کەم پیشان دەدەن و زۆر بە کەمی دەستخۆشی لە کەسانی دەروبەریان دەکەن
- پێیان وایە کەسانی دەوروبەریان بەخێڵییان پێ دەبەن.
نەخۆشی کەسایەتی دوورەپەرێز:
بە گشتی ئەم جۆرە کەسانە خاوەنی هەڵسەنگاندن و و تێڕوانینێکی زۆر نێگەتیڤن لە بارەی کەسانی دەوروبەریان، خواستیان نییە بەشداری هیچ جۆرە چالاکییەکی گرووپی لەگەڵ کەسانی دەوروبەریاندا بکەن، دەکرێت لە سەرەتاکانی لاوێتییانەوە ئەم کۆنیشانانەیان تێدا دەرکەوێت. زۆربەیان لە ژیانیاندا هەست بە تەنیایی و گۆشەگیرییەکی زۆر دەکەن، ئەمەش بە شێوەیەکی سیستیماتیک کاریگەری لەڤسەر دابەزینی ئاست و ڕێژەی متمانە بەخۆبوونیان دادەنێت.
کۆنیشانەکانی ئەم نەخۆشییە بریتییە لە:
- بەردەوام ترسی ئەوەیان هەیە رەت بکرێنەوە و ڕەخنەیان لێ بگیرێت و ترسی ئەوەیان هەیە لە لایەن ئەوانی ترەوە قەبووڵ نەکرێن
- حەزیان لە نزیکبوونەوە لە کەسانی دەوروبەریان نییە
- زۆر بە ئەستەم دەتوانن پەیوەندییەکی دروست و بنیادنەر لە گەڵ کەسانی دەوروبەری خۆیاندا دروست بکەن
- زۆر بە خێرایی توشی ترس و شەرم دەبن
- متمانە بەخۆیان زۆر لاوازە
- زۆر بە ئاسانی لە کاتی گۆڕینی بارودۆخی ژیانیان دەروانن هاوڕێ و ژینگەی نوێ بۆ پەیوەندییەکانیان بخۆلقێنن
- زۆر بە ترسەوە بەرەو کەسانی دەوربەرییان و ئەنجامدانی چالاکییەکان دەچن، چوونکە ترسی ئەوەیان هەیە ڕەت بکرێنەوەو ڕەخنەیان لێ بگیرێت، بۆیێ پێیان باشترە دەروونپەرێزابە بژین
- بەردەوام لە گۆشەو کەنارەوە دادەنیشن و حەز دەکەن نەبیندرێنو جێ سەرنج نەبن.
نەخۆشی کەسایەتی شوێنکەوت(وابەستە):
ئەم کەسانە بە شێوەیەکی زیاد لە پێویست وابەستەی کەسانی دەوروبەریان دەبن، هەمیشە ترسی جیابوونەوە و دوورکەوتنیان هەیە، بە تایبەتی لە سەرەتاکانی لاوێتییەوە.
کۆنیشانەکانی ئەم نەخۆشییە بریتییە لە:
- پێویستیان بەوەیە کەسانی تر لە بارەی پرسە گرنگەکانی ژیانیان بڕیاریان بۆ بدەن
- پێیان وایە هەمیشە پێویستیان بە ڕاوێژ و ڕای ئەوانی تر هەیە
- زۆر بە ئەستەم دەتوانن ناڕەزامەندی خۆیان بەیان بکەن
- زۆر بە ئەستەم دەتوانن بە تەنیا دەست بە ئەنجامی پرۆژەیەک، کارێک یان چالاکییەک بکەن
- ئەو کاتانەی تەنیان هەست بە بێ توانایێکی زۆر دەکەن، چوونکە بەردەوام ترسی ئەوەیان هەیە، بارودۆخێک بێتە پێشەوە ، بە تەنیا نەتوانن ڕووبەڕووی ببنەوە
- هەمیشە ئەو کاتانەی پەیوەندییەکی سۆزدارییان هەیە و کۆتایی پێدێت بە خێرایی دەست بە دروستکردنی پەیوەندییەکی تر دەکەن، چوونکە ناتوانن تەنیا بن.
- بەردەوام ترسێکی لە ڕادەبەدەریان هەیە لەوەی بە جێ بهێڵدرێن و فەرامۆش بکرێن، هۆکارە بنەماییەکەشی ئەوەیە هیچ کات بە تەنیا توانای بەردەوامی و هەڵکردنی تەندروستانەیان لەگەڵ بارودۆخەکانی ژیانیان و هەلومەرجەکاندا نییە.
نەخۆشی کەسایەتی ڕاڕایی_کرداریی
ئەم جۆرە کەسانە یاسا و ڕێسای زۆری ڕەفتارییان هەیە، هەریەکیان بە جۆرێک، نیشانەکانیان بە لیست و هەنگاو بە هەنگاو ئەنجام دەدەن. ءەم نەخۆشییە زۆر بەربڵاوە، بە گشتی توێژینەووەکان ئەوەیان دەرخستووە ئاست و ڕێژەی ئەم نەخۆشییە لای مێینەکان دوو هێندەی نێرینەکانە.
کۆنیشانەکانی ئەم نەخۆشییە بریتییە لە:
- زۆر هەستەوەرانە و ئاگامەندانە لە بارەی خۆیان و ڕەفتار و کردارەکانیان مامەڵە دەکەن
- بەردەوام وا پیشان دەدەن، دەیانەوێت کامڵ و پێرفێکت بن
- هەندێکجار شتی زۆر لاوەکی لە ژیانیاندا کۆدەکەنەوە، تەنانەت ئەگەر هیچ بە کاریشیان نە هێنن و بێسوود بن
- توانای وەلانان و فرێدانیان نییە
- لە بەرنامە و پلانەکانیان هێندە ڕۆدەچنەوە ناوەوە لەوانەیە نەتوانن حیساب بۆ نەریت و کلتوور و کۆمەڵگەکە و دەروبەرەکانیشیان بکەن و ئەمە کێشەی زۆریان بۆ دروست دەکات
- بە هیچ جۆرێک توانای ئەنجامدانی کاری بە گرووپیان نییە و تاقەتی گوێگرتن لە کەسیان نییە، بە مەرجێک لەگەڵ ئەوانی تردا کاروچالاکییەک ئەنجام دەدەن ، کەسەکە بە بە دڵی ئەو هەنگاو بە هەنگاو کارەکان ئەنجام بدات
- شێوازی پلاندانیان بۆ پارە و کۆکردنەوەی سامان بە جۆرێکە زۆر دەستی پێوە دەگرن و هەمیشە وا بیر دەکەنەوە کە پارە دەبێت سەرف نەکرێت و هەڵبگیرێت
- زۆر ڕاشکاو و ڕق و بێهەستوسۆزانە مامەڵە دەکەن، لەسەر ئەو شتانەی دەیانەوێت و خواستیان لەسەریان هەیە .
